حاجيتكم وماجيتكم…على صياد الأخطبوط وتاجر المازوط…حاجيتكم على اللي جمع حب وتبن

الأولى كتب في 22 مايو، 2019 - 20:20 تابعوا عبر على Aabbir
اخنوش
عبّر

نبيل أبوزيد_عبّر

 

 

حاجيتكم وماجيتكم على “حنش” كان صغير وملي كبر ولات سميتو “أحنوش”، حاجيتكم على المنشار اللي طالع واكل نازل واكل، حاجيتكم على مول الضحكة الصفرا والسنة المشقوقة، حاجيتكم على اللي شرا سرب ديال الحمام وشطب ليه بزقو، حاجيتكم على سداري بوكريشة، حاجيتكم على مول الشكارة، اللي فوق الأرض ديالو واللي فالبحر حتى هي ديالو، واللي فالسما ضروري يدير ليها شي تقوليبة باش تنزل للأرض.

 

 

حاجيتكم على اللي مابغاش يطلق شكارة الفلاحة والصيد البحري والمياه والغابات وعاض فيها بإيديه وسنيه ومعنقها برجليه بحال البزولة، حاجيتكم على تمساح التماسيح وعفريت العفاريت وشيطان الشياطين، حاجيتكم على مول المازوط اللي ما گرات فيه لا مقاطعة ولا هم يحزنون، حاجيتكم ماجيتكم على اللي ما يقدر يتحاسب معاه حتى واحد، حاجيتكم على الضاسر راجل الضاسرة، حاجيتكم على مول أكبر حانوت فكازا، الداخلة من عندو والخارجة من عندو.

 

 

حاجيتكم على اللي كيتحكم فالأسعار، حاجيتكم على ثقاب الجيوب، حاجيتكم بخراب البيوت وعدو أصحاب الطاكسيات والشاحنات والدراجات وكل أنواع السيارات، حاجيتكم على اللي رابح الأضعاف المضاعفة من المحروقات، حاجيتكم على اللي خاشي نيفو فكل شي، من يكون ؟

 

 

تابعنا على قناة عبّر على الواتساب من هنا
تابع عبّر على غوغل نيوز من هنا

اترك هنا تعليقك على الموضوع