خالد انبيري / مرة أخرى غادي نكتب بالدراجة على موضوع يعتبر حديث الساعة بمواقع التواصل الإجتماعي بمدينة تارودانت المركز، هاد المدينة اللي كايسيرها حزب العدالة والتنمية بأغلبية ساحقة وبدون حاجة إلى تحالفات، البارح فالوقت اللي الملك محمد السادس استقبل رئيس لجنة النموذج التنموي واللي قدم ليه الصيغة النهائية لهذا البرنامج، تصادف هذا الحدث مع إزاحة الستار عن إحدى المنجزات ديال البيجيدي فتارودانت، واللي كايتغاناو بها، هاد المنجز أسيادي هو “براد ديال اتاي” داروه فواحد الساحة قريبة للمستشفى الإقليمي، باش اللي خرج من هذاك السبيطار الزين بكثرة الإنتظار ادوز اشرب واحد الدكة ديال أتاي منسم بتنسيمة البيجيدي..
صفقة البراد واللي كلفت ميزانية جماعة تارودانت ما يقارب 23 مليون سنتيم، فالوقت اللي أحياء داخل المدينة كحي الزرايب كايعيش واحد الحالة كارثية، كان بإمكان المجلس أن اخصص ليه هاديك 23 مليون لإعادة الهيكلة ديالو ويقي الناس معاناتهم اليومية فهاد الحي، اللي من العيب والعار اكون باقي فتارودانت واللي ميزانية جماعتها تصل إلى 6 مليار سنتيم حي كايعيش بحال هاد المشاكل، تارودانت اللي تدار فيها براد مجسم بهاد الثمن مافيها التصفية ديال الواد الحار، تارودانت اللي تدار فيها هاد البراد خاصها بزااف وبزااف باش تلتحق بركب المدن الراغبة في التقدم رغم أنها أكبر منهم سنا وعراقة وتاريخا.
صفقة البراد أبانت على أن المنتخبين اللي كايسيرو تارودانت التفكير ديالهم محدود والأفق عندهم ضيق، هؤلاء كانت عندهم الفرصة أنهم اخدموا تارودانت مزيان؟ علاش؟ حيث عندهم أغلبية مريحة ومريحة بزااف، عندهم الحزب ديالهم فالأغلبية المسيرة لمجلس جهة سوس ماسة، وعندهم الحكومة كايسيروها ومعظم القطاعات فيها وزراء ديالهم، ومع ذلك ماقدروش احركو هاد المدينة التاريخية رغم هاد الإمكانيات وهاد الامتيازات اللي عندهم، يالله قدرو افكرو اديرو براد، واللي للأسف ماعندو حتى علاقة مع التراث ديال المدينة إذا ما قلنا بأنهم بغاو اديرو مجسمات بحال اللي كاتواجد فعدد من مدن المملكة واللي عندها معاني نظرا لارتباطها بهاد المناطق..
صفقة براد 23 مليون سنتيم لمبديعيه بيجيديو تارودانت، كاتبين لينا بأنه مكاين لا نموذج تنموي لا سيدي بوزكري مع بحال هاد المنتخبين، حيث المنتخب اللي مكايعرف احدد الأولويات مايمكن احقق التنمية المنشودة اللي كانقلبو عليها هادي سنوات وسنوات، وأي نموذج تنموي لتنزيله على أرض الواقع لابد من العنصر البشري اللي كايتعتبر الفاعل الأساسي لتحقيق التنمية، ولكن ماللي كانشوفو الأفكار ديال معظم المنتخبين كانزيدو نتأكدو باللي من الصعب جدا الوصول للمبتغى الى ما تبدلات هاد العقليات اللي كلفات بلادنا الشيء الكثير وضيعت علينا زمن تنموي حقيقي بهاد المشاريع الخاوية اللي كاتستنزف ميزانيات الجماعات الترابية واللي هي فأمس الحاجة ليها.
غادي يشهد التاريخ بأن حزب وضعت فيه ساكنة تارودانت الثقة بأغلبية ساحقة من أجل تنمية المدينة ومن أجل أن يحقق ما كان يتغنى به أعضائه عندما كانوا في المعارضة، خسر 23 مليون سنتيم على براد لن ينفع المدينة في شيء، حزب ظهرت حقيقته بأنه غير قادر على تقديم أية إضافة للمدينة، هذه الحقيقة التي اكتشفها بعض رجاله الذين قدموا استقالاتهم وفروا قبل أن يتورطوا أمام الساكنة التي وثقت فيهم لكن ثقتها خابت بعد مرور 6 سنوات، ولاية كاملة دون أن يتحقق أي شيء من الوعود المعسولة، ليكون مسك الختام ونحن على أبواب الانتخابات، براد ديال اتاي، وكأن لسان حالة منتخبي البيجيدي يقول للساكنة، هاكم هاد البراد بتنسيمة البيجيدي، هادشي اللي قدرنا نديرو ليكم، وأرجوكم امنحونا أصواتكم مرة أخرى، باش الولاية القادمة نديرو لكم حداه طبسيل عامر بالفقاص”، الحاصول: أش خاصك أ تارودانت؟ براد 23 مليون سنتيم أمولاي!!!، أقولو قولي هذا وأستغفر الله لي ولكم وللبيجيدي بتارودانت الذين خذلوا الساكنة وما أوفوا بما عاهدوها به.
اترك هنا تعليقك على الموضوع